Asociación Puntogal

Asociación Puntogal

Novas

A empresa presentara unha queixa ante a ICANN no mes de novembro

Apple aprópiase de 16 dominios de Internet rexistrados por un cidadán

11/01/2010 Apple conseguiu que 16 dominios en Internet rexistrados a nome dun cidadán estadounidense pasen á súa propiedade tras presentar unha queixa ante a ICANN  ao considerar que as direccións das páxinas web facían referencia directa á súa liña de produtos, informa Europa Press.

Os dominios estaban rexistrados a nome de Daniel Bijan, con residencia en Los Angeles, un "mega produtor, cantante e empresario", que ostentaba a propiedade de 16 dominios que a empresa de Cupertino consideraba seus.

Apple presentou unha queixa á ICANN (Internet Corporation for Assigned Names and Numbers) en novembro, e gañou o dereito sobre todos eles o pasado xoves. Os dominios están relacionados cos iPod, accesorios, iPhone, Mac, e MacBook, co dominio macbookpro.com como o máis destacado.

Segundo o documento da corte, Bijan non presentou unha resposta á denuncia de Apple, polo que foi "unha decisión fácil". Con todo, Apple tería conseguido os dominios de igual xeito dado que é a propietaria das marcas comerciais do iPod, iPhone, MacBook e Mac.

Apple alegou que cada un dos dominios era "confusamente similar" aos nomes dos produtos da empresa de Steve Jobs. Ademais argumentou que Bijan estaba utilizando os dominios con "mala fe", xa que estas páxinas remitían a outros produtos que son competencia directa de Apple. Bijan rexistrara os dominios entre 2006 e 2009.

Os dominios que pasaron da propiedade de Bijan á empresa de Cupertino son: blueipod.com, iphonecheap.com, iphonetoys.com, ipodaccessories.info, ipodkits.com, ipodsbaratos.com, macbookpro.biz, macbookpro.com, macbookpro.net, macbookpro.org, macfriend.com, redipods.com, macbook.us, macbookpro.us, macbooks.us e macpro.us.

Segundo o portal especializado TechCrunch, o sorprendente desta lista é que non se atopa, entre os dominios "devoltos" a Apple, ningunha referencia ao seu futuro tablet PC, iSlate, que segundo as previsións, sen confirmar por Apple, anunciarase o próximo 27 de xaneiro.

© Asociación Puntogal