Asociación Puntogal: Novas

Novas

A ASOCIACIÓN CONTA CON 108 ENTIDADES ADHERIDAS

Máis de 12.000 persoas apoian a candidatura do Puntogal

09/10/2011 Máis de 12.200 persoas xa asinaron a través da Rede a prol do Puntogal, a candidatura dun dominio xenérico de primeiro nivel para a lingua e a culturas galegas. A Asociación Puntogal está a redactar a candidatura para o “.gal”, que se poderá remitir á ICANN, a corporación que organiza o funcionamento da Rede, a partir do 13 de xaneiro de 2012.

Dende o inicio da súa labor, a Asociación conta co apoio da Xunta (actualmente a través da da secretaría xeral de Modernización e Innovación Tecnolóxica) para financiar e organizar os traballos de preparación da candidatura. Ademais, entre os seus socios promotores, figuran as tres universidades e as principais institucións culturais do país, como a Real Academia ou o Consello da Cultura Galega.

Para que servirá o .gal?

En total son 108 as entidades adheridas a Puntogal, incluídos máis de 20 centros de emigrantes noutras comunidades autónomas, Portugal, Francia, Suiza, Alemaña, Bélgica, A Arxentina, Estados Unidos, O Uruguai e Brasil.

Servir de vínculo entre as webs da emigración é precisamente un dos obxectivos de Puntogal. Ademais, contar cun dominio propio situará o galego no máximo nivel entre as linguas no DNS, o que repercutirá no seu prestixio internacional. Para os efectos prácticos, atopar e ordenar información en galego resultará moito máis doado, por exemplo para os grandes buscadores.

Reverter beneficios en espallar o galego nas novas tecnoloxías

A nivel económico, Puntogal é unha iniciativa sen ánimo de lucro que pode funcionar sen supor carga algunha para os orzamentos públicos. Ademais, o .gal pode captar recursos do exterior cando as grandes marcas internacionais reserven o seu dominio en galego, www.google.gal por exemplo. Os beneficios que, de lograr o dominio, se acaden serán destinados a fomentar a lingua e a cultura galegas nas novas tecnoloxías.

O modelo a seguir é o da Fundació Puntcat, que xestiona o .cat, o único dominio lingüítico aprobado até hoxe pola ICANN. En menos cinco anos Puntcat, logrou gañar diñeiro abondo para ser autosuficiente, mesmo para financiar bolsas a proxectos da sociedade da información sobre a cultura catalá.

Con todo, para ter opcións de conseguir e facer rendíbel o .gal é imprescindible demostrarlle a ICANN un amplo respaldo institucional e social. Por iso a Asociación Puntogal anima a todos os internautas a aportar o seu grao de area asinando a través de www.puntogal.org.