Asociación Puntogal

Asociación Puntogal

Novas

OS REXISTROS DE ".GAL" TERÁN UNHA REPERCUSIÓN DIRECTA NO FOMENTO DO NOSO IDIOMA NA REDE

Puntogal ultima a candidatura dun dominio de internet para a lingua e a cultura galegas

11/03/2012 O Consello da Xunta acordou o xoves autorizar a subscrición  do convenio polo que a Secretaría Xeral de Modernización e Innovación Tecnolóxica (IMIT) aportará á Asociación Puntogal os recursos financeiros necesarios para presentar a candidatura dun dominio de Internet, o “.gal”, para a comunidade cultural e lingüística galega. A Asociación Puntogal, na que colaboran 110 institucións de toda Galicia e da emigración, leva contando co apoio da Xunta durante varios anos e agora tentará superar o exame do ICANN, a corporación internacional que goberna as direccións de Internet.


A Asociación Puntogal e o resto de candidatos teñen de prazo até o próximo 13 de abril para remitir a súa proposta. A ICANN baralla un escenario de doce meses aproximadamente para publicar os primeiros resultados do exame. Polo tanto, no próximo ano é posible que se poidan rexistrar dominios “.gal”.

Beneficioso para o galego nas novas tecnoloxías

A historia recente dos dominios demostra a viabilidade económica e social dos identificadores culturais. O “.cat”, para a lingua e cultura catalanas logrou rexistrar máis de 53.000 identificadores dende a súa aprobación hai cinco anos, reinvestindo os resultados en bolsas para promover o catalán en internet, entre outras accións. Trátase do único dominio lingüístico aprobado pola ICANN até hoxe.

Cando hoxe alguén dende Galicia rexistra un dominio xenérico (.com, .net. .org, .info, etc.) gran parte dos beneficios da operación marchan fóra. Polo contrario, cando se active un \".gal\" haberá unha repercusión directa en Galicia. A Asociación Puntogal, entidade sen ánimo de lucro, destinará o resultado da súa actividade ó fomento da lingua e a cultura na rede e noutras novas tecnoloxías. Os custes necesarios para poder examinarse diante da ICANN (matrícula, aval, etc.) son sufragados grazas ao convenio coa IMIT, cun importe global de 213.000 euros.

Socios de dez países colaboran co “.gal”

En total son 110 as entidades adheridas a Puntogal, incluídas as institucións culturais máis importantes do país como, por exemplo, as tres universidades, o Consello da Cultura e a Real Academia. Cómpre destacar que entre os socios hai máis de 20 centros de emigrantes noutras comunidades autónomas, Portugal, Francia, Suíza, Alemaña, Bélxica, A Arxentina, Estados Unidos, O Uruguai e Brasil.

Servir de vínculo entre os sitios de Internet da emigración é precisamente outro dos obxectivos de Puntogal. Ademais, contar cun dominio propio situará o galego no máximo nivel entre as linguas no DNS, o que sen dúbida mellorará o seu prestixio dentro e fóra de Galicia. A efectos prácticos atopar, identificar e ordenar información en galego resultará moito máis doado, tanto para os grandes buscadores como para os internautas.

© Asociación Puntogal